Dentro do curso VIII Escuela de Arte y Patrimonio “Marcelino Sanz de Sautuola” da Universidade Menéndez Pelayo, que se celebra en Santander do 30 de xullo ao 3 de agosto, dedicado nesta ocasión a Los museos ante el reto de la sostenibilidad, o vindeiro xoves, ás 12:00 horas, Encarna Lago, xerente da Rede Museística da Deputación de Lugo, impartirá o relatorio “Cohesión social, innovación institucional y sostenibilidad a través de la Rede Museística de Lugo.”
Este curso, dirixido a estudantes, profesionais e interesados nos museos, no patrimonio cultural ou na xestión cultural, pretende analizar a contribución dos museos ao desenvolvemento sostido, entendido dun xeito amplo, tal como o define a Asemblea Xeral da ONU na súa Axenda 2030 para o desenvolvemento sostido. Neste marco, vanse presentar modelos e estratexias de museos que traballan neste concepto en todos os seus ámbitos (social, económico e ambiental) e que se implican coa súa comunidade local, cuidando o patrimonio e os recursos para as xeracións futuras.
Lugo, 30 de xullo de 2018