POSTAIS DA GUERRA DE ÁFRICA. Colección de Manuel Urbano Barrio. Esta mostra, encadrada dentro do programa da Rede Museística da Deputación de Lugo A arte de xuntar

Mañá martes, día 31, ás 20:00 horas, terá lugar na Sala Multiusos do Museo Provincial de Lugo, a inauguración da exposición POSTAIS DA GUERRA DE ÁFRICA. Colección de Manuel Urbano Barrio. Esta mostra, encadrada dentro do programa da Rede Museística da Deputación de Lugo A arte de xuntar e que ten como un dos seus obxectivos darlle visibilidade a diversas coleccións de particulares, está formada por postais que amosan imaxes dunha das contendas máis tráxicas e crueis da historia española do século XX e que tivo unha enorme repercusión nos medios de comunicación.

Con  motivo do 90 aniversario do remate desta contenda, a Rede Museística da Deputación de Lugo quere amosar esta colección de fotos en formato postal realizadas nos anos que durou esta guerra. Trátase de máis de 100 imaxes, a maior parte delas son en branco e negro, se ben hai algunhas coloreadas, que constitúen un documento gráfico de gran importancia no que se poden ver, entre outros aspectos, os primeiros carros de combate.

Ademais do seu valor gráfico e documental, moitas destas postais teñen tamén un valor filatélico, pois varias delas foron enviadas por correo e conservan o seu selo orixinal. Outras destacan, tamén, polo seu valor testemuñal pois recollen relatos de soldados, dirixidos a familiares e amigos, sobre diferentes aspectos desta cruel contenda na que se empregaron gases tóxicos. 

O acto de inauguración contará coa presenza de Mª Pilar García Porto, deputada de Cultura, Patrimonio Histórico Artístico Deseño e Artesanía da Deputación de Lugo; de Encarna Lago, Fernando Arribas e Aquilino González, comisarios da mostra, así como tamén da de Manuel Urbano Barrio.