EXPOSICIÓN: EXPANSIÓN NATURA, Mercedes Paz Pérez no Pazo de Tor (Redemuseística)

EXPOSICIÓN: EXPANSIÓN NATURA, Mercedes Paz Pérez A partir do día 1 de maio e ata o 31 deste mes poderase visitar no Museo Pazo de Tor esta exposición de pinturas e esculturas da artista chantadina Mercedes Paz Pérez. Mercedes Paz é persoa antes que artista. Isto que pode parecer un menosprezo, non é tal, porque nos permite ver unha obra chea de verdade, de pracer verdadeiro. É a arte pola vida ou a vida pola arte, a orde neste caso non importa. O seu traballo é o reflexo dun subconsciente creativo, é un exercicio de madurez e de honestidade. A arte en Mercedes constitúe a materialización dun universo interior propio, libre de banalidades. É outra máis das paradas nesa viaxe de busca, de superación persoal, da percepción dun mesmo e do mundo que nos rodea. Mercedes toma contacto coa arte na súa tenda de enmarcado, que ó pouco tempo se converte nunha galería de arte. Dá o salto definitivo no ano 2012. A crise económica e a difícil situación social provoca nela a necesidade de parar, de deterse a reflexionar sobre quen era e quen quería ser. De este período de introspección saíu unha muller reforzada, sen complexos, sempre creativa, innovadora, disposta a saltar ó baleiro por aquilo no que cree, pero sen esquecer o aprendido no pasado. Foi o pulo que necesitaba para meterse de cheo no mundo da creación artística. (máis info)