Tapas de Cultura e visitas Emancipadas na Rede Museística
As
novas ofertas da Rede Museística para o verán 2015 inclúen breves
percorridos guiados e guías para visitas autónomas
O Departamento de Didáctica da Rede Museística de Lugo, ofrece
novas iniciativas gratuítas para que este verán os seus visitantes
poidan gozar da cultura dende unha nova perspectiva. Así desde o 4
de agosto ata o 31 de setembro poranse en marcha nos museos da rede
as Tapas de Cultura e as Vistas Emancipadas.
As Tapas de Cultura na Rede son percorridos temáticos de 20 minutos
de duración centrados en diferentes aspectos das coleccións que van
desde o legado romano en Lugo ata a arte contemporánea pasando pola
ourivería e as pegadas medievais.
Estas “degustacións” culturais terán lugar de Luns a Venres ás
11:00 e ás 17:00 con comentarios en Galego ou Castelán e ás 11:30
mais ás 17:30 en varias lingua estranxeiras, entre elas inglés,
italiano ou incluso xaponés, dado que a Rede participa este ano no
proxecto de intercambio cultural con Xapón denominado Via Lactea, no
que están involucradas as Universidades xaponesas de Aichi e
Kanazawa.
Ademais destas píldoras de arte e cultura enfocadas dun xeito aberto
e participativo os numerosos turistas que se achegan a Lugo durante o
período estival contarán coa posibilidade de organizar a súa
propia visita de antemán descargando os folletos informativos que a
Rede pon a disposición na web en 12 linguas diferentes. Os amantes
do lecer activo poderán programar con liberdade a súa visita
contando sempre coa acollida e hospitalidade do persoal dos museos
tamén coas Visitas Emancipadas. Con elas foméntanse as cada vez
máis comúns rutas personalizadas para quen practica o turismo
activo conte con percorridos orientativos acompañados dun mapa que
amosan os museos da Rede a través de 10 pezas senlleiras localizadas
en diferentes salas. Os itinerarios variarán cada mes, presentando
diferentes obxectos e obras de arte representativos das coleccións
custodiadas na Rede.