OLLADAS DE MULLER SOBRE A GUÍA POSTAL DE LUGO DE MARUJA MALLO e a presentación do catálogo A arte de ser muller nun mundo por compartir 4.0. Esta mostra, comisariada por Encarna Lago e Anxela Caramés, xira arredor da Guía Postal de Lugo, un cadro que fóra pintado por Maruja Mallo
Mañá venres, día 7, ás 20:00 horas, terá lugar na Sala de Exposicións do Pazo de San Marcos (Deputación Provincial de Lugo) a inauguración da exposición OLLADAS DE MULLER SOBRE A GUÍA POSTAL DE LUGO DE MARUJA MALLO e a presentación do catálogo A arte de ser muller nun mundo por compartir 4.0. Esta mostra, comisariada por Encarna Lago e Anxela Caramés, xira arredor da Guía Postal de Lugo, un cadro que fóra pintado por Maruja Mallo en 1929 por encargo da Deputación de Lugo, para ilustrar as páxinas da publicación El libro de oro de Lugo y su provincia. Con tal fin, convidouse a 10 mulleres artistas a recrear e reinterpretar a obra orixinalutilizando diferentes técnicas e conceptos. Buscábase relacionar a linguaxe plástica e innovadora de Maruja Mallo coas tendencias visuais actuais, establecendo vínculos e diferenzas, para mostrar as múltiples posibilidades de abordar o tema tratado en Guía Postal de Lugo. Contouse coa participación de Mónica Alonso, Carla Andrade, Mónica Cabo, Carolina Cruz Guimarey, Xisela Franco, Carmen Llonín, Paulova y el Colectivo Tanuki (Nieves Neira y Cristina Sánchez). Xunto a elas, Vari Caramés, participa cunha fotografía xa publicada en Miradoiro Galicia, mais que nunca fóra exposta.
O proxecto expositivo enmárcase dentro do programa A arte de ser muller nun mundo por compartir 5.0, unha iniciativa centrada na visibilización das mulleres no eido creativo, levada a cabo pola Rede Museística Provincial de Lugo, Área de Cultura e Turismo da Deputación de Lugo, así como pola Vicepresidencia 1ª desta institución.
O acto inaugural contará coa presenza de Mario Outeiro, deputado delegado da Área de Cultura e Turismo, das comisarias e das artistas participantes, tendo lugar tamén a performance A deriva de Maruja Mallo a cargo do Colectivo Tanuki.
A entrada a este acto é libre e gratuíta.
Comentarios
Publicar un comentario