Álbum de Memoria Compartida en Tor
O xoves, día 9 de marzo, dende as 10:30 ata ás 13:00 horas, terá lugar no Museo Pazo de Tor un novo obradoiro do programa ‘Álbum de Memoria Compartida’ realizado en colaboración con AFAMÓN e dirixido a persoas con Alzheimer. Neste obradoiro, a partir dunha selección de obxectos deste museo, e usando a psicoestimulación cognitiva e a técnica da reminiscencia, vaise tratar de desencadear nas persoas participantes a lembranza de vivencias a través do motor emocional, establecendo pontes entre o pasado e o presente. Ademais, neste obradoiro vaise facilitar material para empregar na casa ou no propio centro, polos familiares ou polos coidadores para que poidan utilizalo, facendo entre todos un álbum de memoria compartida.
A través de varias sesións, que se desenvolverán nas instalacións dos catro museos da Rede Museística da Deputación de Lugo, e con distintas actividades (Memoria do pan, receitas da memoria, nobelo da memoria, tirando do fío, etc) vanse tratar temas diferentes de entre os contidos do seu interese e os fondos da Rede Museística.
Empregando diferentes recursos e dinámicas, así como elementos do patrimonio cultural inmaterial como os ditos, os contos e as lendas, a música e as cancións, as receitas, os usos sociais ou os acontecementos festivos da cultura popular galega, todos eles relacionados coas coleccións destes museos, preténdese reactivar episodios biográficos para reforzar a identidade e a autoestima nese Álbum de Memoria Compartida.
Comentarios
Publicar un comentario