Sábado, 14 de abril de 2012
Hospital Psiquiátrico San Rafael, en Castro Riberias do Lea, Castro de Rei (Lugo).
Con esta xornada de portas abertas ponse o ramo a este proxecto efímero de creación artística multidisciplinar que denominamos EntoleARTE, promovido pola Rede Museística da Deputación de Lugo, xunto coas áreas de Cultura e Turismo, e Benestar Social. O que comezou a súa andaina o 10 de marzo remata este sábado, 14 de abril de 2012, coas exposicións, intervencións e actuacións programadas no edificio do antigo Hospital Psiquiátrico San Rafael nunha xornada de intercomunicación dos creadores e das súas obras co público nun espazo tan singular, radical e telúrico coma este vello edificio do manicomio de Castro.
Desde a Rede Museística da Deputación de Lugo queremos agradecer ao cento longo de persoas que participan neste proxecto desde disciplinas como a pintura, escultura, gravado, literatura, teatro, música, fotografía, cine, danza, esmalte, muralismo, performance… a súa desinteresada implicación nesta experiencia fugaz, única e irrepetible, para materializar os seus diferentes puntos de vista e convidar a todos e a todas a que aproveiten esta ocasión única para visitar tanto este edificio de memorias asfixiantes, como as obras que se expoñen ou representan, ideadas desde e para un espazo pouco ou nada convencional. GRAZASSSSSSSS DO COMITE ORGANIZADOR!!!
Comentarios
Publicar un comentario