A Rede Museística en Tarraco Viva 2013
Dende fai oito anos o Museo Provincial de Lugo está presente na Feira de Museos, Monumentos e Xacementos de época romana, que se celebra en Tarragona do 28 ao 30 de maio, dentro as XII Xornadas Internacionais de Actividades de Promoción do mundo romano, organizadas polo Museo de Historia da Cidade de Tarragona. Nesta ocasión levaremos o material do Departamento de didáctica utilizado para traballar a colección de prehistoria e arqueoloxía. Asi como información da Rede Museística.
Esta feira ten por obxecto a divulgación entre o gran público do coñecemento da historia antiga, en especial de época romana, mediante a sensibilización e a participación cidadá, así como a creación dun lugar de encontro para institucións culturais, investigadores e grupos de recreación.
Na presente edición o número de museos e institucións participantes ascende a 45, procedentes tanto da Península Ibérica como de Europa. Nesta ocasión, as representacións institucionais convidadas son os Museos dos Foros Imperiais de Roma e o xacemento de Baalbek (Líbano).
Neste contexto de difusión e promoción, a participación do Museo, representado polo arqueólogo Enrique Alcorta Irastorza, concrétase nun stand no que se pretende amosar as súas principais liñas de actuación dentro do marco da historia e arqueoloxía. Liñas que, entre otras, se centran en dar a coñecer o seu programa de actividades pedagóxicas así como resaltar o seu papel na conservación, exposición e difusión dos materiais arqueolóxicos depositados no mesmo e, de xeito especial, os de época romana, tendo en conta, ademais, que este ano se celebra o décimo aniversario da declaración como Patrimonio da Humanidade da Muralla de Lugo e do conxunto monumental de Tarragona.
Comentarios
Publicar un comentario