PROXECTO ARTISTICO LITERARIO CON ARTISTAS LUCENSES

Instaladas tres novas obras no roteiro de Fiz Vergara

---

Etiquetas: Lóuzara, proyecto artístico-literario, Fiz vergara

13/12/2009 - A.C.V. (Sarria)

Tres novas obras de arte salpican a paisaxe de Lóuzara (Samos) dentro do roteiro artísticoliterario do poeta Fiz Vergara Vilariño, un proxecto único en Galicia que estará rematado nuns días.

Trece artistas plásticos colaboran desinteresadamente na súa creación, aportando outras tantas pezas inspiradas en poemas do autor samonense. As tres últimas creacións instaladas corresponden a Miguel A. Macía, Paco Poy e Primitivo Lareu, quen ideou unha ‘Muller unicornio’, nome co que bautizou unha escultura de 2,5 metros de altura que loce xa na rotonda de Airapadrón. Este punto marca o inicio do roteiro, que percorre 7,5 quilómetros ata rematar no Pozo de Beltrán, en Santalla de Lóuzara, lugar natal do poeta.

Miguel Macía creou en bronce unha figura feminina, a súa ‘Musa para Fiz’ que, dende o alto de Santalla, olla cara a vivenda do autor. A terceira peza, firmada por Poy, sitúase na aira de Tesín, onde o artista colocou un escano e unha lareira, «lembrando que a casa é o cerne habitado do que bebe o poeta», explica María Casar, presidenta da agrupación Ergueitos.

Este colectivo sarriao é o impulsor da iniciativa, xunto coa Asociación de Escritores en Lingua Galega (AELG), a Deputación, Agader, o Concello de Samos e a familia de Fiz. O proxecto completarase nos vindeiros días coas aportacións de Eduardo Valiña e Buciños, que se suman ás obras xa instaladas de Álvaro de la Vega, Fernando Yáñez, Mónica Alonso, Caamaño, Violeta Bernardo, Paco Pestana, Otero-Yglesias e Caxigueiro.

Será o «primeiro roteiro» destas características en Galicia, que se prevé inaugurar nos primeiros meses do 2010 e será publicitado no blog de Ergueitos e nas webs de Samos e da AELG», apunta Casar.

En Airapadrón, un gran panel informa sobre todo o roteiro, documentado en cada unha das súas partes con datos dos artistas e dos poemas de Fiz, para permitirlles ós visitantes —varios institutos xa amosaron interese por percorrelo— un «achegamento multidisciplinar á plástica e á literatura.