DOMINIOS EU

Os dominios .eu ábrense aos caracteres internacionais

 

Dende hoxe as empresas e persoas individuais residentes na Unión Europea poderán rexistrar nomes de dominio internacionalizados (IDN) co sufixo .eu, de xeito que caracteres coma o ñ, as vogais acentuadas, as diéreses e incluso os caracteres dos alfabetos grego ou búlgaro estarán dispoñibles para o seu rexistro baixo o dominio europeo de primeiro nivel, que se adapta así ás 23 linguais oficiais presentes nos 27 Estados membros da U.E.

 

Hai que lembrar que este tipo de nomes de dominio non deben empregarse de xeito exclusivo, posto que moitos usuarios internacionais terán problemas para teclear os caracteres especiais, á vez que son incompatibles con vellos navegadores web (coma o Internet Explorer 6) e coa meirande parte das plataformas de correo electrónico.

 

Estes dominios poden contratarse a través de numerosos axentes rexistradores, aínda que no momento de escribir estas liñas, ningún dos comprobados aceptaba aínda o rexistro dos novos dominios que serán asignados por orde de chegada, o que podería supor toda unha vaga de rexistros nas vindeiras horas, de cara a protexer intereses de particulares e empresas que busquen ocupar os nomes de Internet que poidan afectar ás súas marcas e iniciativas